(Heluhelu ʻia kēia pule, i hoʻomāʻikeʻike ʻia e ‘Abdu’l-Bahá, ma Kona Wahi Hoʻāno. Puana ʻia ma ka pule mehameha kekahi.)

ʻO ka mea e puana aku i kēia pule me ka haʻahaʻa a me ke kipona aloha, ʻo ia ka mea e hauʻoli ai a ʻoliʻoli ka naʻau o kēia Kauā; kohu like ia i ka pili alo a alo me Ia.

ʻO ia nō ka Hanohano Poʻokela!

E ke Akua ē, kuʻu Akua! Me ka haʻahaʻa a me nā waimaka au e hāpai aʻe ai i nā lima nonoi iā ʻoe a huli iho koʻu alo i ka ʻehu lepo o ka Paehumu Ou, ka mea i hiʻilani ʻia aʻela ma luna aku o ka ʻike o ka naʻauao a i luna hoʻi o ka hoʻomaikaʻi a nā mea a pau e hoʻonani ana iā ʻOe. E ʻoluʻolu, e nānā mai ʻOe i Kāu kauā, i moe haʻahaʻa a kolokolohai ma ka paehumu Ou, me nā ʻalawa ʻana mai o ka maka o Kou aloha a e hoʻoluʻu ihola iā ia i Ka Moana o Kou lokomaikaʻi mau loa.

E ke Akua ē! He kauā haʻahaʻa loa ʻo ia Ou, i ilihia a e noi haʻahaʻa nei iā ʻOe, paʻa ihola i Kō lima e pule kūlipo ana iā ʻOe, e hilinaʻi ana iā ʻOe, me nā waimaka i mua o Kou alo, e kānaenae ana iā ʻOe a e noi ana iā ʻOe, me ka ʻōlelo ʻana:

E ka Haku, e kuʻu Akua ē! Ō hō mai i Kō aloha e lawelawe au i Kou poʻe i aloha ʻia, e hoʻoikaika iaʻu i kaʻu lawena iā ʻOe, e hoʻomālamalama maila i kuʻu lae me ka mālamalama o ka hoʻomana ma Kou pōʻai ʻihiʻihi, a me ka mālamalama hoʻi o ka pule i Kou aupuni hanohano. Ō hoʻoulu mai i haʻahaʻa kuʻu naʻau ma ka paepae lani o Kou puka, a e kōkua i koʻu hihia ʻole aku i nā mea a pau o loko o nā ao hemolele Ou. E ka Haku ē! Ō hāinu mai iaʻu me ka ipu o ka naʻau haʻahaʻa; me ka ʻaʻahu o ka naʻau haʻahaʻa e hōʻaʻahu mai ai iaʻu, a i ka moana o ua naʻau haʻahaʻa lā e hoʻoluʻu iho ai iaʻu. Ō hoʻolilo iaʻu i ʻehu lepo i ke ala o ka poʻe aloha Ou, a e ʻae mai iaʻu e mōlia i koʻu ʻuhane no ka ʻāina i hoʻohiehie ʻia ihola e nā koʻele wāwae o Kou poʻe wae ʻia ma ke ala Ou, e ka Haku o ka Hanohano Poʻokela.

Me kēia pule e kānaenae aku ai Kou kauā iā ʻOe, i ka wehena kaiao a i ke kulu aumoe. Ō hoʻokō i ka ʻanoʻi ona, e ka Haku! Ō hoʻomālamalama i kona puʻuwai, e hoʻohauʻoli i kona naʻau, e hoʻā i kona mālamalama, i hiki ai iā ia ke lawelawe i Kou Kumu a me Kou poʻe kauā.

ʻO ʻOe ka Mea Hō Mai, ka Mea Menemene, ka Mea Lako Loa, ka Mea ʻOluʻolu, ka Mea Lokomaikaʻi, ka Mea Aloha.